ନୂଆଦିଲ୍ଲୀ: ‘ଘର କିଣନ୍ତୁ , ପତ୍ନୀ ପାଆନ୍ତୁ’ । ଏହା ପଢିବା ପରେ ଆପଣ ଆଶ୍ଚର୍ଯ୍ୟ ହୋଇଯାଉଥିବେ ନିଶ୍ଚୟ । ହେଲେ ଘଟଣାଟି ସତ । ଚୀନର ଏକ ରିଏଲ ଇଷ୍ଟେଟ କମ୍ପାନୀ ଏପରି ଅଫର ଦେଉଛି । କମ୍ପାନୀର ଏକ ବିଜ୍ଞାପନ ଏବେ ଚାରିଆଡ଼େ ଚର୍ଚ୍ଚା ଜୋର ଧରିଛି ।
ଗ୍ରାହକଙ୍କୁ ଆକୃଷ୍ଟ ପାଇଁ କମ୍ପାନୀ ଦେଉଛି ଏପରି ଅଫର
ସାଧାରଣତଃ ପ୍ରତ୍ୟେକ ଲୋକ ସୁନ୍ଦର ଘର ଖଣ୍ଡିଏ ପାଇଁ ସ୍ୱପ୍ନ ଦେଖନ୍ତି । ସେଥିଲାଗି ସେମାନେ ଜୀବନର ଅର୍ଜିତ ଧନକୁ ଲଗାଇ ଦିଅନ୍ତି । ଏଥିସହିତ ବହୁତ ପରିଶ୍ରମ ବି କରନ୍ତି । ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ରିଏଲ ଇଷ୍ଟେଟ କମ୍ପାନୀଗୁଡିକ ଅନେକ ସୁବିଧା ଦେବା ସହ ଅଫର ପ୍ରଦାନ କରିଥାଏ, ଯାହା ଗ୍ରାହକକୁ ଆକୃଷ୍ଟ କରିବ । ବଡ଼ ରିହାତି ଓ ମାଗଣା ରେଜିଷ୍ଟ୍ରେସନ ଆଦି ଅନେକ ସୁବିଧା ପ୍ରଦାନ କରେ । କିନ୍ତୁ, ଆଜିକାଲି ଗୋଟିଏ ଅଫର ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି । ‘ଘର କିଣନ୍ତୁ ତାସହ ପତ୍ନୀ ପାଆନ୍ତୁ’ । ଏହି ବିଜ୍ଞାପନ ଭାଇରାଲ ହେବା ପରେ କମ୍ପାନୀକୁ ସମାଲୋଚନା କରାଯାଇଛି ।ବାସ୍ତବରେ ଏହି ଅଫର ଚୀନର ଏକ ରିଏଲ୍ ଇଷ୍ଟେଟ୍ କମ୍ପାନୀ ଦ୍ୱାରା କରାଯାଇଥିଲା । ଆଜିକାଲି ଚୀନର ସେୟାର ବଜାର ଅତ୍ୟନ୍ତ ଖରାପ ପର୍ଯ୍ୟାୟ ଦେଇ ଗତି କରୁଛି, ତେଣୁ ଘର ବିକ୍ରୟ ବୃଦ୍ଧି କରିବାକୁ ଚାଇନାର ରିଏଲ୍ ଇଷ୍ଟେଟ୍ କମ୍ପାନୀ ଏହି ଅଫର ଦେଇଛି । ଚୀନର ବୃହତ୍ତମ ରିଏଲ୍ ଇଷ୍ଟେଟ୍ କମ୍ପାନୀ Evergrande ର ଦେବାଳିଆ ହୋଇଯାଇଛି । ଏହା ଚୀନ୍ର ରିଏଲ ଇଷ୍ଟେଟ ବଜାର ଓ ଅନ୍ୟାନ୍ୟ କମ୍ପାନୀ ଉପରେ ମଧ୍ୟ ପ୍ରଭାବ ପକାଇଛି । ଏହି ସଙ୍କଟ ମଧ୍ୟରେ ଅନ୍ୟ ଏକ ରିଏଲ୍ ଇଷ୍ଟେଟ୍ କମ୍ପାନୀ ମଧ୍ୟ ନିଜକୁ ଦେବାଳିଆ ଘୋଷଣା କରିଛି । ରିଅଲ୍ ଇଷ୍ଟେଟ୍ ବଜାରରେ ଚାଲିଥିବା ଏହି ସଙ୍କଟ ଯୋଗୁଁ ଚୀନର ୪ ଟି ବଡ ସହରରେ ଘର ମୂଲ୍ୟ ୧୧ ରୁ ୧୪ ପ୍ରତିଶତ ହ୍ରାସ ପାଇଛି । ନୂଆ ଘର ବିକ୍ରିରେ ୬ ପ୍ରତିଶତ ହ୍ରାସ ଘଟିଛି ।
ବିଜ୍ଞାପନ ଭାଇରାଲ ହେବା ପରେ କମ୍ପାନୀ ଭରିଲା ଜରିମାନା
ଚୀନର ରିଏଲ୍ ଇଷ୍ଟେଟ୍ ବଜାରରେ ବିଶୃଙ୍ଖଳା ମଧ୍ୟରେ ଗୋଟିଏ ତିଆଞ୍ଜିନ ଭିତ୍ତିକ କମ୍ପାନୀ ଗ୍ରାହକଙ୍କୁ ଘର ବିକ୍ରୟ ବୃଦ୍ଧି ପାଇଁ ହାସ୍ୟାସ୍ପଦ ଅଫର ଦେଇଥିଲା । କମ୍ପାନୀ ଏହାର ପ୍ରଚାରରେ କହିଛି, ‘ଘର କିଣ, ମାଗଣା ପତ୍ନୀ ପାଅ’ । କମ୍ପାନୀର ଏହି ବିଜ୍ଞାପନ ଭାଇରାଲ ହେବାରେ ଲାଗିଛି ।ଏହା ପରେ ମାର୍କେଟ ନିୟାମକ କମ୍ପାନୀ ଉପରେ ୪୧୮୪ ଡଲାର ଜରିମାନା ଆଦାୟ କରିଛନ୍ତି, ଯାହାକି ଭାରତୀୟ ଟଙ୍କା ପାଖାପାଖି ୩.୫ ଲକ୍ଷ ଟଙ୍କା । ସେହିପରି ଚୀନ୍ର ଜିନଜିଆଙ୍ଗରେ ଏକ କମ୍ପାନୀ ଲୋକଙ୍କୁ ପ୍ରତିଶୃତି ଦେଇଛି ଯେ ଯଦି ସେମାନେ ଏହାକୁ କିଣିବେ ତେବେ ସେମାନଙ୍କୁ ସୁନା ଇଟା ଦେବେ । ଚୀନରେ ଏପରି ହାସ୍ୟାସ୍ପଦ ଅଫର ସୂଚାଇ ଦେଉଛି ଯେ ରିଅଲ୍ ଇଷ୍ଟେଟ୍ ବଜାରର ଅବସ୍ଥା ଅତି ଶୋଚନୀୟ ଅବସ୍ଥା ଦେଇ ଗତି କରୁଛି ।
