ମୁମ୍ବାଇ: ବଲିଉଡ଼ର ଖିଲାଡ଼ି ଅକ୍ଷୟ କୁମାର ଓ କିଙ୍ଗ୍ ଶାହରୁଖ ଖାନ୍ଙ୍କର ବଲିଉଡରେ ଭିନ୍ନ ଭିନ୍ନ ପ୍ରଭାବ ରହିଛି । ଏହି ଦୁହିଁ ଯୋଡ଼ିଙ୍କୁ ଲୋକେ ଏକାଠି ଦେଖିବାକୁ ଚାହାଁନ୍ତି । ହେଲେ ଏପରି ସୁଯୋଗ କେବେ ମିଳେ ନାହିଁ । ଯଦି କେବେ ମିଳିଛି ତାହା କେଇ ସେକେଣ୍ଡ ବା ମିନିଟ୍ ପାଇଁ । ଶାହରୁଖ ଖାନ ନିଜର କେତେଜଣ ସମସାମୟିକ ଅଭିନେତାଙ୍କ ସହ ସ୍କ୍ରିନ୍ସେୟାର କରିଛନ୍ତି, ଯେପରି ସଲମାନ ଖାନ ଓ ସୈଫ ଅଲି ଖାନ ଇତ୍ୟାଦି । ଅକ୍ଷୟ କୁମାର ବି ଏପରି ଅଭିନେତାଙ୍କ ସହ ସ୍କ୍ରିନ୍ସେୟାର କରିଛନ୍ତି । କିନ୍ତୁ ଦୁହେଁ କେବେ କାହିଁକି ଏକାଠି ଅଭିନୟ କରିନାହାନ୍ତି ସେ ନେଇ ଶାହାରଖ କହିଛନ୍ତି ।
ଅକ୍ଷୟ ସୁଟିଂ ସାରିବା ପରେ ମୁଁ ପହଞ୍ଚେ
ଅକ୍ଷୟ କୁମାରଙ୍କ ସହ ଶାହରୁଖ କାହିଁକି କାମ କରିପାରନ୍ତିନି, ସେ ନେଇ ଶାହରୁଖ ଏକ ସାକ୍ଷାତକାରରେ ଉତ୍ତର ରଖିଥିଲେ । ସେ ଏହାର ଉତ୍ତର ମଜାଳିଆ ଢଙ୍ଗରେ ଦେଇ କହିଥିଲେ, ଯଦି କୌଣସି ଫିଲ୍ମ ନିର୍ମାତା ଦୁହିଁଙ୍କୁ ଗୋଟିଏ ଫିଲ୍ମରେ କାମ କରିବା ପାଇଁ ନିଅନ୍ତି, ତେବେ ବି ଦୁହିଙ୍କୁ କେବେ ଏକାଠି ଦେଖିବାକୁ ମିଳିପାରିବ ନାହିଁ । କାରଣ ଅକ୍ଷୟ କୁମାର ଯେତେବେଳେ ସୁଟିଂ ସେଟ୍ରୁ ବିଦାୟ ନେଇ ଯିବେ, ସେ ସେତିକିବେଳେ ସୁଟିଂ ସେଟ୍ରେ ପହଞ୍ଚିବେ । ଅକ୍ଷୟ କୁମାରଙ୍କ ଅତି ଭୋରରୁ ଉଠିବା ଅଭ୍ୟାସ । ତେଣୁ ସକାଳୁ ସକାଳୁ ସେ ନିତ୍ୟକର୍ମ ସାରି ସୁଟିଂସେଟ୍ରେ ପହଞ୍ଚି ଯାଆନ୍ତି । କିନ୍ତୁ ଶାହରୁଖଙ୍କର ବିଳମ୍ବରେ ଉଠିବା ଅଭ୍ୟାସ । ତେଣୁ ସେ ଡେରିରେ ସୁଟିଂ ସେଟ୍କୁ ଆସନ୍ତି । ଏହି କାରଣରୁ ଦୁହିଁଙ୍କ ଭିତରେ କେବେ ଦେଖା ହୋଇପାରେନା ।
୨ଟି ଫିଲ୍ମରେ ଆସିଥିଲେ ଏକାଠି
କେବଳ ଦୁଇଟି ଫିଲ୍ମରେ ଶାହରୁଖ-ଅକ୍ଷୟଙ୍କୁ ଏକାଠି ଦେଖିବାକୁ ମିଳିଥିଲା । ଗୋଟିଏ ହେଉଛି ‘ଦିଲ ତୋ ପାଗଲ ହୈ’, ଯେଉଁଥିରେ ଦୁହିଁଙ୍କୁ କେଇ ସେକେଣ୍ଡ ପାଇଁ ଏକାଠି ଦେଖିବାକୁ ମିଳିଥିଲା । ସେହିପରି ଅକ୍ଷୟ କୁମାରଙ୍କ ଏକ ଫିଲ୍ମର ଏକ ଗୀତ ଥିଲା ‘ହେ ବିବି’ । ଏଥିରେ ଅକ୍ଷୟ, ରିତେଶ ଦେଶମୁଖ ଓ ବିଦ୍ୟା ବାଲାନଙ୍କ ସହ ଶାହରୁଖଙ୍କୁ ବି କିଛି ମିନିଟ୍ ପାଇଁ ଦେଖିବାକୁ ମିଳିଥିଲା ।
