ଚୀନ ଓ ଏହାର ସର୍ବେସର୍ବା ରାଷ୍ଟ୍ରପତି ସି ଜିନପିଙ୍ଗକୁ ନେଇ ବଡ଼ଧରଣର ଗୁଜବ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଶନିବାର ଦିନ ଏହି ଗୁଜବ ଜୋର ଧରିଥିଲା । ବିଜେପି ନେତା ତଥା ଚୀନ ବିଶେଷଜ୍ଞ ସୁବ୍ରମଣ୍ୟମ ସ୍ୱାମୀ ମଧ୍ୟ ଟୁଇଟ୍ କରି ଏହି ଗୁଜବକୁ ଅଧିକ ବଳ ଦେଇଥିଲେ । ତେବେ ସେ ଗୁଜବର ସତ୍ୟାସତ୍ଯ ଯାଂଚ୍ ଜରୁରୀ ବୋଲି କହିଥିଲେ । ଗୁଜବ ଅନୁସାରେ ଚୀନରେ ଏକ ସାମରିକ ବିଦ୍ରୋହ ଦ୍ୱାରା ପିପୁଲ’ସ ଲିବରେସନ୍ ଆର୍ମୀ କ୍ଷମତା ଦଖଲ କରିଛି । କ୍ଷମତା ଦଖଲ ପରେ ରାଷ୍ଟ୍ରପତି ସି ଜିନ୍ ପିଙ୍ଗଙ୍କୁ ନଜରବନ୍ଦୀ କରାଯାଇଥିବା ମଧ୍ୟ କୁହାଯାଉଛି ।
ସୁବ୍ରମଣ୍ୟମ ସ୍ୱାମୀ ତାଙ୍କ ଟ୍ୱିଟରେ କହିଥିଲେ ଯେ, ଚୀନକୁ ନେଇ ନୂଆ ଗୁଜବ । କୁହାଯାଉଛି ଯେ, ସି ଜିନପିଙ୍ଗ ସମରକନ୍ଦରେ ଥିବା ବେଳେ କମ୍ୟୁନିଷ୍ଟ ପାର୍ଟି ତାଙ୍କୁ ସେନା ଅଧ୍ୟକ୍ଷ ପଦରୁ ହଟାଇ ଦେଇଥିଲା । ଏହାପରେ ତାଙ୍କୁ ଗୃହବନ୍ଦୀ କରାଯାଇଛି ।
https://twitter.com/Swamy39/status/1573544718507868160?ref_src=twsrc%5Etfw%7Ctwcamp%5Etweetembed%7Ctwterm%5E1573544718507868160%7Ctwgr%5E89f64e787f1c4b2af6fb2fab022ce8caef5d1af1%7Ctwcon%5Es1_&ref_url=https%3A%2F%2Fwww.aajtak.in%2Fworld%2Fstory%2Fchinese-president-xi-jinping-under-house-arrest-bjp-leader-subramanian-swamy-tweet-raised-questions-ntc-1543634-2022-09-24
କେବଳ ସ୍ୱାମୀ ନୁହନ୍ତି,ଚୀନ ସୋସିଆଲ ମିଡିଆରେ ସକ୍ରୀୟ ଥିବା ବ୍ୟକ୍ତି ମଧ୍ୟ ଏଭଳି ଦାବି କରୁଛନ୍ତି । ସେହିଭଳି ଗୋଟିଏ ଟ୍ୱିଟରେ ଜଣେ ବ୍ୟକ୍ତି ଦାବି କରିଛନ୍ତି ଯେ,ବେଜିଂକୁ ସଂଯୋଗ କରୁଥିବା ଦୁଇଟି ସହରରୁ ପିପୁଲସ ଲିବରେସନ୍ ଆର୍ମୀର ସୈନିକ ରାଜଧାନୀରେ ପ୍ରବେଶ କରିବା ସହିତ ସହରର ଗୁରୁତ୍ୱପୂର୍ଣ୍ଣ ସ୍ଥାନକୁ ନିଜ ନିୟନ୍ତ୍ରଣକୁ ନେଇଛନ୍ତି । ତାଙ୍କ ଅନୁସାରେ ୮୦ କିଲୋମିଟର ଲମ୍ବା ଧାଡିରେ ସେନା ବେଜିଂରେ ପ୍ରବେଶ କରିଥିଲା । ସି ଜିନପିଙ୍ଗକୁ ସେନା ନଜରବନ୍ଦୀ କରିଛି ବୋଲି ସେ ଦାବି କରିଛନ୍ତି । ଏନେଇ ସେ ଗୋଟିଏ ଭିଡିଓ ମଧ୍ୟ ସେୟାର କରିଛନ୍ତି । ତାଙ୍କ ଅନୁସାରେ ଲି କିୟାଓମିଙ୍ଗ ଚୀନର ନୂଆ ରାଷ୍ଟ୍ରପତି ଭାବେ ଦାୟିତ୍ୱ ଗ୍ରହଣ କରିଛନ୍ତି ।
ଅନ୍ୟ ଏକ ଦାବି ଅନୁସାରେ ସମରକନ୍ଦରେ ଆୟୋଜିତ SCO ଶିଖର ସମ୍ମିଳନୀରେ ଯୋଗ ଦେଇ ୧୬ ସେପ୍ଟମ୍ବରରେ ସି ଜିନପିଙ୍ଗ ବେଜିଂ ଫେରିଥିଲେ । ତେବେ ବିମାନବନ୍ଦରରୁ ତାଙ୍କୁ ସେନା ନିଜ କବଜାକୁ ନେଇଥିଲା । କବଜାକୁ ନେବା ପରେ ସି ଏବେ ନଜରବନ୍ଦୀ ଅଛନ୍ତି । କୁହାଯାଉଛି ଯେ, ସମରକନ୍ଦରେ ଥିବା ବେଳେ ତାଙ୍କୁ ସେନା ଅଧ୍ୟକ୍ଷ ପଦରୁ ହଟା ଯାଇଥିବା ଖବର ପାଇବା ପରେ ସି ତୁରନ୍ତ ବେଜିଂ ଫେରି ଆସିଥିଲେ । ଏହା ପଛରେ ପୂର୍ବତନ ରାଷ୍ଟ୍ରପତି ହୁ ଜିନତାଓ ଓ ପୂର୍ବତନ ପ୍ରଧାନମନ୍ତ୍ରୀ ୱେନ୍ ଜିଆବାଓ ଥିବା ଅନୁମାନ କରାଯାଉଛି । ଏହି ଦୁଇଜଣ ଷ୍ଟାଣ୍ଡିଂ କମିଟିର ପୂର୍ବତନ ସଦସ୍ୟ ସଙ୍ଗ ପିଙ୍ଗଙ୍କୁ ପ୍ରଭାବିତ କରି ସେଣ୍ଟ୍ରାଲ ଗାର୍ଡ୍ ବ୍ୟୁରୋର ନିୟନ୍ତ୍ରଣ ନିଜ ହାତକୁ ନେଇଥିଲେ । ସୂଚନାଯୋଗ୍ୟ ଯେ, ବ୍ୟୁରୋ ଚୀନ ରାଷ୍ଟ୍ରପତିଙ୍କ ସହିତ ସେଣ୍ଟ୍ରାଲ କମିଟିର ଗୁରୁତ୍ୱପୂର୍ଣ୍ଣ ନେତାଙ୍କୁ ସୁରକ୍ଷା ଦେଇଥାଏ ।
ପିପୁଲ’ସ ଲିବରେସନ୍ ଆର୍ମିର ଜେନରାଲ ଲି କିୟାଓମିଙ୍ଗ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଉପରେ ଅସନ୍ତୁଷ୍ଟ ଥିଲେ । ଜିନତାଓ ସାଙ୍ଗ ପିଙ୍ଗକୁ ଜିନପିଙ୍ଗଙ୍କ ବିରୋଧରେ ବିଦ୍ରୋହ କରିବାକୁ ପ୍ରବର୍ତ୍ତାଇଥିଲେ । ସାଙ୍ଗ୍ ପିଙ୍ଗ୍ ଏଥିରେ ରାଜି ହୋଇଥିଲେ । ସି ବେଜିଂରେ ପହଂଚିବା ପରେ ତାଙ୍କ ସୁରକ୍ଷାକର୍ମୀ ହିଁ ତାଙ୍କୁ ଗିରଫ କରିଥିବା କୁହାଯାଉଛି । ଜିନତାଓ ଜାଣିଥିଲେ ଯେ, ସି’ଙ୍କ ସମର୍ଥକ ଏହାକୁ ବିରୋଧ କରିବେ ତେଣୁ ସେନାର ଜେନରାଲ ଲି କିୟାଓମିଙ୍ଗଙ୍କୁ ନିଜ ପଟକୁ ଆଣିଥିଲେ । ବେଜିଂକୁ ନିୟନ୍ତ୍ରଣରେ ରଖିବା ସହିତ ସମ୍ଭାବ୍ୟ । ବିରୋଧକୁ ଦମନ କରିବାକୁ ଜେନରାଲ ଲି କିୟଓମିଙ୍ଗ୍ ସେନାକୁ ବେଜିଂରେ ଭର୍ତ୍ତି କରାଇଥିବା କୁହାଯାଉଛ ।
ଏହି ଗୁଜବକୁ ଗୁରୁତ୍ୱ ଦେବାର ଦୁଇଟି କାରଣ ରହିଛି । ପ୍ରଥମ କାରଣ ହେଲା ଅକ୍ଟୋବର ମାସରେ ସି ଜିନପିଙ୍ଗ ତୃତୀୟ ଥର ପାଇଁ ରାଷ୍ଟ୍ରପତି ହେବାକୁ ଯାଉଛନ୍ତି । ଏମିତି ହେଲେ ସେ ଆଜିବନ ଚୀନର ରାଷ୍ଟ୍ରପତି ରହିବେ । ଏହା ସହିତ ନିକଟରେ ଚୀନର ଦୁଇ ଜଣ ପୂର୍ବତନ ମନ୍ତ୍ରୀଙ୍କୁ ଦୁର୍ନୀତି ଅଭିଯୋଗରେ ମୃତ୍ୟୁ ଦଣ୍ଡାଦେଶ ହୋଇଛି । ସି ଜିନପିଙ୍ଗ୍ ବିରୋଧିଙ୍କୁ ବିଭିନ୍ନ ଅଭିଯୋଗରେ ମୃତ୍ୟୁ ଦଣ୍ଡ ଦେବା ସହିତ ଗୃହବନ୍ଦୀ କରୁଛନ୍ତି । ତେଣୁ ଦଳରେ ଏହାକୁ ନେଇ ବିରୋଧ ରହିଛି । ତାଙ୍କୁ ବିରୋଧ କରୁଥିବା ପାର୍ଟିର ବରିଷ୍ଠ ନେତା ଆଗକୁ ସି ଜିନପିଙ୍ଗଙ୍କ ଆକ୍ରୋଶର ଶିକାର ହେବା ନିଶ୍ଚିତ । ତେଣୁ ଏହି ନେତା ମାନେ ସାମରିକ ବିଦ୍ରୋହ କରିଥିବା ଅନୁମାନ କରାଯାଏ । ସୂଚନାଯୋଗ୍ୟ ଯେ, ସି ଜିନପିଙ୍ଗଙ୍କ ଅମଳରେ ଅନେକ ନେତା ଓ ଶିଳ୍ପପତି ଗାଏବ ହୋଇଯାଇଛନ୍ତି । ଅନେକ ଗୃହବନ୍ଦୀ ହୋଇଛନ୍ତି ।
ବିଦ୍ରୋହ ଗୁଜବକୁ ଅଧିକ ବିଶ୍ୱାସ କରିବାର ଆଉ ଗୋଟିଏ କାରଣ ହେଉଛି ଚୀନରେ ବିମାନ ଚଳାଚଳ ବନ୍ଦ ରହିଛି । ପୃଥିବୀରେ ବିମାନ ଚଳାଚଳକୁ ମନିଟରିଂ କରୁଥିବା ଏକ ୱେବସାଇଟ୍ ଅନୁସାରେ ଶନିବାର ଦିନ ଚୀନରେ ପ୍ରାୟ ୪ ହଜାର ୫ଶହ ବିମାନକୁ ଓହ୍ଲାଇ ଦିଆଯାଇଥିଲା । ଅର୍ଥାତ ୪ ହଜାର ୫ଶହ ବିମାନ ଉଡ଼ିନଥିଲେ । ସେହିଭଳି ବୁଲେଟ୍ ଟ୍ରେନର ଟିକେଟ୍ ବୁକିଂ ବନ୍ଦ ରହିଥିଲା । ପୁରା ଦେଶରେ ଏଭଳି ଜବରଦସ୍ତ ସୁରକ୍ଷା ବନ୍ଦୋବସ୍ତ ପଛରେ କିଛି ବଡ଼ ଧରଣର କାରଣ ରହିଛି ବୋଲି କୁହାଯାଉଛି ।
