ମୁମ୍ବାଇ : ଆଜି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବଲିଉଡ ଅଭିନେତ୍ରୀ କଙ୍ଗନା ରାନାୱତଙ୍କ ସହ ଫିଲ୍ମ ‘ତେଜସ’ ଦେଖିବେ । କଙ୍ଗନାଙ୍କ ଅଭିନିତ ଏହି ଫିଲ୍ମର ସ୍ୱତନ୍ତ୍ର ସ୍କ୍ରିନିଂ ଲୋକ ଭବନ ଅଡିଟୋରିୟମରେ ରଖାଯାଇଛି । ମୁଖ୍ୟମନ୍ତ୍ରୀ ଯୋଗୀଙ୍କ ସହ ତାଙ୍କର କିଛି ମନ୍ତ୍ରୀ ମଧ୍ୟ ଫିଲ୍ମ ଦେଖିବାର କାର୍ଯ୍ୟକ୍ରମ ରହିଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏହି ସୂଚନା ଦିଆଯାଇଛିି । ତେଜସ ଫିଲ୍ମକୁ ୟୁପିରେ ଟ୍ୟାକ୍ସମୁକ୍ତ କରାଯାଇପାରେ ବୋଲି ଆଶା ରଖିଛନ୍ତି କଙ୍ଗନା । ଏହାପୂର୍ବରୁ ୟୁପିରେ ଅନେକ ଫିଲ୍ମକୁ ଟ୍ୟାକ୍ସମୁକ୍ତ କରାଯାଇଛି । ଏଥିମଧ୍ୟରୁ କାଶ୍ମୀର ଫାଇଲ୍ସ, କେରଳ ଷ୍ଟୋରୀ ଭଳି ଫିଲ୍ମ ମଧ୍ୟ ଟିକସମୁକ୍ତ କରାଯାଇଥିଲା ।
ବାୟୁସେନା ଅଧିକାରୀ ଭାବେ ନଜର ଆସିଛନ୍ତି କଙ୍ଗନା
ଭାରତୀୟ ବାୟୁସେନାର ଅଦମ୍ୟ ସାହସର କାହାଣୀକୁ ନେଇ ନିର୍ମିତ ହୋଇଛି ଫିଲ୍ମ ତେଜସ୍ । ଯେଉଁଥିରେ କଙ୍ଗନା ତେଜସ ଗିଲ ନାମକ ଜଣେ ବାୟୁସେନା ଅଧିକାରୀଙ୍କ ଭୂମିକାରେ ଅଭିନୟ କରିଛନ୍ତି, ଯିଏ ଏଜେଣ୍ଟକୁ ଉଦ୍ଧାର କରିବା ପାଇଁ ପାକିସ୍ତାନ ଯାଇଛନ୍ତି । ଏହି ଫିଲ୍ମକୁ ନେଇ କଙ୍ଗନା ଏବେ ଚର୍ଚ୍ଚାରେ ଅଛନ୍ତି । ଏଥିରେ ସେ ଚିତାକର୍ଷକ ଅଭିନୟ କରିଛନ୍ତି, ଯାହାକୁ ଲୋକେ ଖୁବ୍ ପସନ୍ଦ କରିଛନ୍ତି । ମଙ୍ଗଳବାର ପୂର୍ବାହ୍ନ ୧୧ଟାରେ ମୁଖ୍ୟମନ୍ତ୍ରୀ କ୍ୟାବିନେଟ ବୈଠକ ଡାକିଛନ୍ତି । ଯେଉଁଥିରେ ୟୁପିର ଉଭୟ ଉପମୁଖ୍ୟମନ୍ତ୍ରୀ ସେଠାରେ ରହିବେ । ଏହି ବୈଠକ ପରେ ମୁଖ୍ୟମନ୍ତ୍ରୀ ତାଙ୍କର ସମସ୍ତ ମନ୍ତ୍ରୀଙ୍କ ସହ ତେଜସ ଫିଲ୍ମର ସ୍ୱତନ୍ତ୍ର ସ୍କ୍ରିନିଂ ଦେଖିବେ ।
