୧୯୬୮ରେ ଦୁଇ ଜଣ କ୍ୟାପ୍ଟେନଙ୍କ ମଧ୍ୟରେ ଟଣାଓଟରାରୁ ଆରମ୍ଭ ହୋଇଥିଲା ଭାରତୀୟ ହକିର ପତନ
ଭାରତୀୟ କ୍ରିକେଟରେ ଏବେ ଷ୍ଟାର ୱାର ଚାଲିଛି । ଗୋଟିଏ ପଟେ ବିରାଟ କୋହଲି ତ’ ଅନ୍ୟପଟେ ରୋହିତ ଶର୍ମା । ମଝିରେ ଅଛି ବିସିସିଆଇ ଅର୍ଥାତ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ୍ । ରୋହିତଙ୍କୁ ବୋର୍ଡ୍ ଦିନିକିଆ ଓ ଟି-୨୦ର ଅଧିନାୟକ କରିଛି । ଅନ୍ୟପକ୍ଷରେ ଏବେ ବିରାଟଙ୍କ ପାଖରେ ଟେଷ୍ଟ୍ କ୍ରିକେଟର ଅଧିନାୟକତ୍ୱ ରହିଛି । ଦୁଇ ଷ୍ଟାରଙ୍କ ମଧ୍ୟରେ ଭିଡାଭିଡି ପାଇଁ ଦଳ ଦୁଇ ଭାଗରେ ବିଭକ୍ତ ହୋଇ ସାରିଲାଣି ବୋଲି ଶୁଣିବାକୁ ମିଳୁଛି ।
ଏହି ଲଢେଇ କେଉଁ ପର୍ଯ୍ୟନ୍ତ ଯିବ ସେସମ୍ପର୍କରେ ଏବେ କିଛି କୁହାଯାଇ ପାରିବ ନାହିଁ । କିନ୍ତୁ ଭାରତୀୟ କ୍ରୀଡ଼ା ଇତିହାସ ଉପରେ ଯଦି ନଜର ପକାଇବା ତେବେ ଜାଣିବା ଯେ, ଏଭଳି ଅହଂ ସଂଘର୍ଷ ପାଇଁ ଭାରତୀୟ ଖେଳର କ୍ଷତି ହିଁ ହୋଇଛି । ଯାହାର ସବୁଠାରୁ ବଡ଼ ଉଦାହରଣ ହେଉଛି ଭାରତୀୟ ହକି । ୫୩ ବର୍ଷ ତଳେ ଦୁଇ ଜଣ ଷ୍ଟାର ହକି ଖେଳାଳୀଙ୍କ ମଧ୍ୟରେ କ୍ୟାପ୍ଟେନ ପଦ ପାଇଁ ହୋଇଥିବା ସଂଘର୍ଷରୁ ହକିର ପତନ ଆରମ୍ଭ ହୋଇଥିଲା ।
ପୃଥ୍ୱୀପାଲ ସିଂହ ବନାମ ଗୁରବଖ୍ସ ସିଂହ : ଅହଂର ସଂଘର୍ଷରୁ ହକିର ପତନ
୧୯୨୮ରୁ ୧୯୬୪ ମଧ୍ୟରେ ଭାରତୀୟ ହକି ଟିମ୍ ଅଲମ୍ପିକ୍ସର ସବୁ ଫାଇନାଲରେ ଉପସ୍ଥିତ ଥିଲା । ୧୯୬୦କୁ ଛାଡି ପ୍ରତି ଅଲମ୍ପିକ୍ସରେ ଭାରତୀୟ ହକି ଟିମ୍ ସ୍ୱର୍ଣ୍ଣ ପଦକ ଜିତିଥିଲା । ୧୯୬୦ ରୋମ୍ ଅଲମ୍ଫିକ୍ସରେ ପାକିସ୍ତାନଠାରୁ ଭାରତ ଫାଇନାଲରେ ହାରିଥିଲା । ତେବେ ୧୯୬୪ରେ ଭାରତ ପାକିସ୍ତାନ ଉପରେ ପ୍ରତିଶୋଧ ନେଇ ସ୍ୱର୍ଣ୍ଣ ପଦକ ଉପରେ ଅଧିକାର ସାବ୍ୟସ୍ତ କରିଥିଲା । ତେବେ ୧୯୬୮ ମେକ୍ସିକୋ ଅଲମ୍ପିକ୍ସରୁ ଭାରତୀୟ ହକିର ପତନ ଆରମ୍ଭ ହୋଇଥିଲା । କାରଣ ଏହି ଅଲମ୍ପିକ୍ସରେ ଭାରତୀୟ ଟିମର କ୍ୟାପ୍ଟେନ୍ କିଏ ହେବ ତାକୁ ନେଇ ଆରମ୍ଭ ହୋଇଥିଲା ବିବାଦ । ପୃଥ୍ୱୀପାଲ ଓ ଗୁରବଖ୍ସଙ୍କ ମଧ୍ୟରେ ଅଧିନାୟକତ୍ୱ ପାଇଁ ପ୍ରତିଦ୍ୱନ୍ଦ୍ୱିତା ଆରମ୍ଭ ହୋଇଥିଲା । ଉଭୟ ନିଜକୁ ଅଧିକ ଯୋଗ୍ୟ କହି ଅଧିନାୟକତ୍ୱ ପଦବୀ ଉପରେ ଦାବି ରଖିଥିଲେ ।
ଦୁଇ ଜଣ କ୍ୟାପ୍ଟେନ୍ !
ଦୁଇ ଷ୍ଟାର ଖେଳାଳୀଙ୍କ ମଧ୍ୟରେ ସଂଘର୍ଷ ଏତେ ବଢିଥିଲା ଯେ, ହକି ସଂଘ ବିବାଦର ସମାଧାନ ପାଇଁ ଦୁଇ ଜଣଙ୍କୁ କ୍ୟାପ୍ଟେନ୍ କରିଥିଲା । ଯାହାକି ଆଶ୍ଚର୍ଯ୍ୟଜନକ ଘଟଣା ଥିଲା । ଗୋଟିଏ ଦଳର ଦୁଇ ଜଣ କ୍ୟାପ୍ଟେନ ଭଳି ଘଟଣା କ୍ରୀଡ଼ା ଇତିହାସରେ ସମ୍ଭବତଃ ପ୍ରଥମ ଥର ପାଇଁ ଘଟିଥିଲା । ଦୁଇ କ୍ୟାପ୍ଟେନଙ୍କ ପାଇଁ ଦଳ ମଧ୍ୟ ଦୁଇ ଭାଗରେ ବିଭକ୍ତ ହୋଇଥିଲା । ଯାହାର ପ୍ରଭାବ ପ୍ରଦର୍ଶନ ଉପରେ ପଡିଥିଲା । ଅଲମ୍ପିକ୍ସ ଇତିହାସରେ ଭାରତୀୟ ହକି ଟିମ୍ ପ୍ରଥମ ଥର ପାଇଁ ଫାଇନାଲରେ ପହଂଚି ପାରିନଥିଲା । ଭାରତ ମେକ୍ସିକୋ ଅଲମ୍ପିକ୍ସରେ ରଜତ ପଦକ ଅବଶ୍ୟ ଜିତିଥିଲା କିନ୍ତୁ ଏହିଠାରୁ ହିଁ ଭାରତୀୟ ହକିର ପତନ ଆରମ୍ଭ ହୋଇଥିଲା । ୧୯୭୬ ଭାରତୀୟ ହକି ଟିମ୍ ସପ୍ତମ ସ୍ଥାନରେ ରହିଥିଲା । ୧୯୮୦ର ମସ୍କୋ ଅଲମ୍ପିକ୍ସରେ ଭାରତ ସ୍ୱର୍ଣ୍ଣ ପଦକ ଜିତିଥିଲା କିନ୍ତୁ ସତ ହେଲା ଏହି ଅଲମ୍ପିକ୍ସରେ ପାକିସ୍ତାନ,ପଶ୍ଚିମ ଜର୍ମାନୀ ଭଳି ଶକ୍ତିଶାଳୀ ଦଳ ଭାଗ ନେଇନଥିଲେ । ସେମାନେ ଏହି ଅଲମ୍ପିକ୍ସକୁ ବର୍ଜନ କରିଥିଲେ । ଫଳରେ ଭାରତ ସହଜ ବିଜୟ ହାସଲ କରିଥିଲା ବୋଲି କୁହାଗଲା । ୧୯୮୪ରୁ ୨୦୧୬ ମଧ୍ୟରେ ଭାରତୀୟ ହକି ଟିମ୍ ଅଲମ୍ପିକ୍ସରେ ଖାତା ହିଁ ଖୋଲି ପାରିନଥିଲା । ଭାରତୀୟ ହକି ଟିମ ପାଇଁ ପଦକ ମରୁଡି ୨୦୨୧ ଟୋକିଓ ଅଲମ୍ପିକ୍ସର ସରିଥିଲା । ୪୦ ବର୍ଷ ପରେ ଭାରତୀୟ ହକି ଟିମ୍ ଅଲମ୍ପିକ୍ସରେ ପଦକ ପାଇଥିଲା ।
ବିରାଟ-ରୋହିତ ବିବାଦ ଏଇଥିପାଇଁ ଡରାଉଛି
ଦୁଇ ଜଣ କ୍ୟାପ୍ଟେନଙ୍କ ମଧ୍ୟରେ ଟଣାଓଟରା ପାଇଁ ଯେମିତି ହକିର ପତନ ହୋଇଥିଲା ଭାରତୀୟ କ୍ରିକେଟରେ ମଧ୍ୟ ସେହିଭଳି ଘଟିବ ବୋଲି ଆଶଙ୍କା କରାଯାଉଛି । କାରଣ ଟେଷ୍ଟ୍ ଓ ଦିନିକିଆ ପାଇଁ ଦୁଇ ଜଣ କ୍ୟାପ୍ଟେନ ନୀତିର ଭାରତୀୟ ଦଳ ଉପରେ ନକରାତ୍ମକ ପ୍ରଭାବ ପକାଇ ପାରେ । ବିରାଟ କହୁଛନ୍ତି ଯେ, ତାଙ୍କୁ ଇଛା ବିରୋଧରେ ଦିନିକିଆ କ୍ୟାପ୍ଟେନ ପଦରୁ ହଟା ଯାଇଛି । କିନ୍ତୁ ବୋର୍ଡ୍ କହୁଛି ବିରାଟ ଟି-୨୦ କ୍ୟାପ୍ଟନସି ଛାଡନ୍ତୁ ବୋଲି କେହି ଚାହୁଁନଥିଲେ । କିନ୍ତୁ ସେ ନିଜ ଇଛାରେ ଏହି ପଦ ଛାଡିବା ପରେ ବୋର୍ଡର ଅନୁଭବ ହେଲା ଯେ, ହ୍ୱାଇଟ୍ ବଲ କ୍ରିକେଟ୍ ପାଇଁ ଦୁଇ ଜଣ କ୍ୟାପ୍ଟେନ ଠିକ୍ ହେବ ନାହିଁ । ତେଣୁ ତାଙ୍କୁ ଦିନିକିଆ ଅଧିନାୟକତ୍ୱ ଛାଡିବାକୁ କୁହାଯାଇଥିଲା । ଏବେ ଏହି ବିବାଦ ଥମିବ ନା ଦୁଇ କ୍ୟାପ୍ଟେନଙ୍କ ପାଇଁ ଭାରତୀୟ କ୍ରିକେଟ୍ ପ୍ରଭାବିତ ହେବ ତାହା ଦେଖିବାକୁ ବାକି ରହିଲା ।
