ଆମେରିକାରେ ଏଇ କିଛିଦିନ ହେବ ରାଷ୍ଟ୍ରପତିଙ୍କ ସହିତ ସବୁବେଳେ ଥିବା କଳା ରଙ୍ଗର ସୁଟକେସ ନ୍ୟୁକ୍ଲିୟର ଫୁଟବଲର ସୁରକ୍ଷାକୁ ନେଇ ବେସ ଚର୍ଚ୍ଚା ହେଉଛି । ଏଭଳି ଚର୍ଚ୍ଚାର କାରଣ ହେଉଛି ନିକଟରେ ଏକ ମିଡିଆ ରିପୋର୍ଟରେ ଦାବି କରାଯାଇଥିଲା ଯେ, ଜାନୁଆରୀ ୬, ୨୦୨୧ର ୟୁଏସ କ୍ୟାପିଟାଲ ହିଲ ଉପରେ ଟ୍ରମ୍ପ ସମର୍ଥକଙ୍କ ଆକ୍ରମଣ କାଳରେ ଏହି ସୁଟକେସ ଦଙ୍ଗାକାରୀଙ୍କ କବଜାକୁ ଆସୁ ଆସୁ ବଂଚିଥିଲା । କୁହାଯାଉଛି ଯେ, ଏହି ସୁଟକେସର ଗୋଟିଏ କପ ଉପରାଷ୍ଟ୍ରପତିଙ୍କ ପାଖରେ ଥାଏ । ସେତେବଳେର ଉପରାଷ୍ଟ୍ରପତି ମାଇକ୍ ଫେନ୍ସ ଦଙ୍ଗାକାରୀଙ୍କ ହାବୁଡରେ ପଡିଥିଲେ । ଦଙ୍ଗାକାରୀ ମାଇକ୍ ଓ ସୁଟକେସ ପାଖରୁ ମାତ୍ର ଶହେ ଫୁଟ ଦୁରରେ ଥିଲେ । ତେବେ ସୌଭାଗ୍ୟବଶତଃ ସେମାନଙ୍କ ନଜର ମାଇକଙ୍କ ଉପରେ ପଡିନଥିଲା । ଏମିତିରେ ପ୍ରଶ୍ନ ଉଠୁଛି ଯେ, ଯଦି ନ୍ୟୁକ୍ଲିୟର ଫୁଟବଲ ଦଙ୍ଗାକାରୀଙ୍କ ହାତରେ ପଡିଥାନ୍ତା ତେବେ ସେମାନେ କ’ଣ କୌଣସି ଦେଶ ଉପରେ ପରମାଣୁ ଆକ୍ରମଣ କରିପାରିଥାନ୍ତେ ?
ସୁଟକେସ୍ ଆଉ କାହା ହାତରେ ପଡିଲେ ବି ବିପଦ ନାହିଁ
ଆମେରିକୀୟ ସୁରକ୍ଷା ବିଶେଷଜ୍ଞଙ୍କ ଅନୁସାରେ ନ୍ୟୁକ୍ଲିୟର ଫୁଟବଲ ସୁଟକେସ୍ ଆଉ କାହା ହାତରେ ପଡିଲେ ମଧ୍ୟ ବିଶ୍ୱ ସୁରକ୍ଷା ପାଇଁ କୌଣସି ବିପଦ ନାହିଁ । କାରଣ ପରମାଣୁ କ୍ଷପଣାସ୍ତ୍ର ଲଂଚ କରିବାକୁ ଏକ ଲଂଚ୍ କୋଡ୍ ଆବଶ୍ୟକ । ଯାହା କେବଳ ଆମେରିକା ରାଷ୍ଟ୍ରପତିଙ୍କ ପାଖରେ ଥାଏ । ତେବେ ଏବେ ଆମେରିକା ପ୍ରଶାସନ ମଧ୍ୟ ନ୍ୟୁକ୍ଲିୟର ଫୁଟବଲ ଗାଏବ ହେବା ପରିସ୍ଥିତିରେ ସୃଷ୍ଟି ହେବାକୁ ଥିବା ସମ୍ଭାବ୍ୟ ପରିସ୍ଥିତିର ମୁଲ୍ୟାଙ୍କାନ କରିବାକୁ ନିଷ୍ପତି ନେଇଛି ।
ନ୍ୟୁକ୍ଲିୟର ଫୁଟବଲ ବା ବିସ୍କିଟ୍ କ’ଣ ?
ଆମେରିକା ରାଷ୍ଟ୍ରପତିଙ୍କ ସହିତ ସଦାସର୍ବଦା କଳା ରଙ୍ଗର ଏକ ସୁଟକେସ୍ ରହିଥାଏ । ଏହି ସୁଟକେସର ଯୁଦ୍ଧ ଯୋଜନା, ଆକ୍ରମଣକୁ ମଂଜୁରି ଦେବା ସମ୍ବନ୍ଧିତ କମ୍ପ୍ୟୁଟର କୋଡ୍ ଓ କମ୍ୟୁନିକେସନ୍ ଡିଭାଇସ ରହିଥାଏ । ଏହାର ଓଜନ ପାଖାପଖି ୨୦କିଲୋ । ଏହାକ ମଧ୍ୟ ନ୍ୟୁକ୍ଲିୟର ଫୁଟବଲ କୁହାଯାଇଥାଏ । ଅନ୍ୟପକ୍ଷରେ ‘ବିସ୍କିଟ୍’ ଏକ କାର୍ଡ୍, ଯାହା ଉପରେ ନ୍ୟୁକ୍ଲିୟର କୋଡ୍ ସବୁ ଲେଖାଥାଏ । ଏହି କାର୍ଡକୁ ଆମେରିକା ରାଷ୍ଟ୍ରପତି ସବୁବେଳେ ନିଜ ପାଖରେ ରଖିଥାନ୍ତି । ରାଷ୍ଟ୍ରପତିଙ୍କ ସହିତ ଉପରାଷ୍ଟ୍ରପତିଙ୍କ ପାଖରେ ମଧ୍ୟ ଏହି ନ୍ୟୁକ୍ଲିୟର ଫୁଟବଲ ଥାଏ । ଯଦି କୌଣସି କାରଣରୁ ରାଷ୍ଟ୍ରପତି ଅସମର୍ଥ ହୁଅନ୍ତି ତେବେ ଉପରାଷ୍ଟ୍ରପତି ଆଣବିକ ଆକ୍ରମଣ ଆରମ୍ଭ କରିପାରିବେ । ଏହି ଫୁଟବଲ ଭିତରେ ୩ରୁ ୫ ଇଂଚ ଲମ୍ବର ଏକ କାର୍ଡ୍ ରହିଥାଏ । କ୍ରେଡିଟ୍ କାର୍ଡ୍ ଭଳି ଦେଖା ଯାଉଥିବା ଏହି କାର୍ଡକୁ ବିସ୍କୁଟ୍ କୁହାଯାଏ । ଏଥିରେ ୫ଟି ଆଲାର୍ମ ଥାଏ ।
ନ୍ୟୁକ୍ଲିୟର ଫୁଟବଲ୍ ନେଇ କିଏ ଯାଏ ?
ଆମେରିକା ରାଷ୍ଟ୍ରପତିଙ୍କ ଅତି ନିକଟତମ ଓ ବିଶ୍ୱସ୍ତ ବ୍ୟକ୍ତିଙ୍କୁ ଏହି ସୁଟକେସ ସମ୍ଭାଳିବା ଦାୟିତ୍ୱ ମିଳିଥାଏ । ସେ ସବୁବେଳେ ରାଷ୍ଟ୍ରପତିଙ୍କ ସହିତ ଛାଇ ଭଳି ଥାନ୍ତି । ରାଷ୍ଟ୍ରପତି ଯେଉଁଠାକୁ ଯାଆନ୍ତି ସେଠାକୁ ଏହି ସୁଟକେସ୍ ନେଇ ସେହି ବ୍ୟକ୍ତି ମଧ୍ୟ ଯାଆନ୍ତି । ରାଷ୍ଟ୍ରପତିଙ୍କ ଏହି ସହଯୋଗୀ ତାଙ୍କ ସହିତ ଗୋଟିଏ କାରରେ ଯାଇଥାନ୍ତି । ଏମିତିକି ଗୋଟିଏ ଲିଫ୍ଟରେ ସେ ରାଷ୍ଟ୍ରପତିଙ୍କ ସହ ଯାଆନ୍ତି । ରାଷ୍ଟ୍ରପତିଙ୍କ ସୁରକ୍ଷା କରୁଥିବା ସିକ୍ରେଟ୍ ସର୍ଭିସେସ୍ ଏହି ବ୍ୟକ୍ତିଙ୍କ ସୁରକ୍ଷା କରନ୍ତି । ସୁଟକେସ ଗୋଟିଏ ଚମଡା ଷ୍ଟ୍ରାପ୍ ଦ୍ୱାରା ଏହି ବ୍ୟକ୍ତିଙ୍କ ହାତରେ ବନ୍ଧା ହୋଇ ରହିଥାଏ ।
