ମୋଦି ସରକାରର ୨୦୨୨ ବଜେଟକୁ ନେଇ ଉତ୍ତର ଭାରତର ଏକ ପ୍ରମ୍ମୁଖ ହିନ୍ଦି ଖବରକାଗଜ ଦୈନିକ ଭାସ୍କର କରିଥିବା ଅନଲାଇନ୍ ସର୍ବେକ୍ଷଣରୁ ଯେଉଁ ତଥ୍ୟ ଆସିଛି ତାହା କେନ୍ଦ୍ର ସରକାର ଲାଗି ଉତ୍ତର ପ୍ରଦେଶ ନିର୍ବାଚନ ପୂର୍ବରୁ ସତର୍କ ଘଣ୍ଟି । ଏହି ସର୍ଭେରେ ଭାଗ ନେଇଥିବା ୫୮ ପ୍ରତିଶତରୁ ଅଧିକ ଲୋକଙ୍କ କହିବା ହେଉଛି-ବଜେଟ୍ କିଛି କାମକୁ ନୁହେଁ । ଏହି ବଜେଟ୍ ନିରାଷଜନକ ବୋଲି ସେମାନଙ୍କ ମତ । ୫୫ ପ୍ରତିଶତ ଲୋକଙ୍କ କହିବା ହେଉଛି ବଜେଟ୍ ପାଇଁ ଦରଦାମ ବଢିବ । ସର୍ଭରେ ଭାଗ ନେଇଥିବା ଆୟକର ଦାତା ମଧ୍ୟ ନିର୍ମଳାଙ୍କ ବଜେଟକୁ ନେଇ ହତାସ ଅଛନ୍ତି ।
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ବଜେଟ୍ ଭାଷଣ ପରେ ପରେ ଖବର କାଗଜ ତରଫରୁ ୫ଟି ପ୍ରଶ୍ନକୁ ନେଇ ସର୍ଭେ କରାଯାଇଥିଲା । ଯେଉଁ ସବୁ ପ୍ରଶ୍ନକୁ ନେଇ ସର୍ଭେ କରାଯାଇଥିଲା ତା’ ଉପରେ ମତଦାତାଙ୍କ ମତ କ’ଣ ଥିଲା ଆସନ୍ତୁ ଜାଣିବା ।
୧. ଆୟକରଦାତାଙ୍କ ଉପରେ ଏହି ବଜେଟର କ’ଣ ପ୍ରଭାବ ରହିବ ?
ଏହି ପ୍ରଶ୍ନର ଉତ୍ତରର ଦେଇ ୭୨ ପ୍ରତିଶତ କହିଥିଲେ ଯେ, ଆୟକରଦାତାଙ୍କ ପାଇଁ ବଜେଟରେ କିଛି ମଧ୍ୟ ନାହିଁ । ଅନ୍ୟପକ୍ଷରେ ୧୧ ପ୍ରତିଶତଙ୍କ ମତ ଥିଲା ଯେ, ବଜେଟ୍ ଆୟକରଦାତାଙ୍କୁ ଆଶ୍ୱସ୍ତି ଦେଇଛି । ୧୧ ପ୍ରତିଶତଙ୍କ କହିବା ଥିଲା ଆଶ୍ୱସ୍ତି ତ ମିଳିନି କିନ୍ତୁ ଯାହା ଭାବିଥିଲୁ ସେହି ଅନୁସାରେ ହୋଇନାହିଁ । ବାକି ୬ ପ୍ରତିଶତ କିଛି ମଧ୍ୟ କହିବାକୁ ମନା କରିଥିଲେ ।
୨. ବଜେଟର ଦରଦାମ ବୃଦ୍ଧି ଉପରେ କ’ଣ ପ୍ରଭାବ ପଡିବ ?
ଏହାର ଉତ୍ତରରେ ୫୫ ପ୍ରତିଶତ କହିଛନ୍ତି ଯେ,ଏହି ବଜେଟ୍ ଦ୍ୱାରା ଦରଦାମ ବଢିବ । କିନ୍ତୁ ୧୧ ପ୍ରତିଶତ କହୁଛନ୍ତି ବଜେଟ୍ ଯୋଗୁଁ ମୂଲ୍ୟବୃଦ୍ଧି ଉପରେ ଲଗାମ ଲାଗିବ । ସେହିଭଳି ୨୪ ପ୍ରତିଶତଙ୍କ କହିବା ହେଉଛି ବଜେଟର ଦରଦାମ ବୃଦ୍ଧି ଉପରେ କିଛି ମଧ୍ୟ ପ୍ରଭାବ ପଡିବ ନାହିଁ । ଅନ୍ୟପକ୍ଷରେ ୧୧ ପ୍ରତିଶତ କୌଣସି ମତ ଦେଇ ନଥିଲେ ।
୩. ବଜେଟକୁ ନେଇ ଆପଣ ସନ୍ତୁଷ୍ଟ କି ?
ଏହାର ଉତ୍ତର ମୋଦି ସରକାରଙ୍କ ପାଇଁ ଚିନ୍ତାର କାରଣ ହୋଇପାରେ । ପାଖାପାଖି ୬୦ ପ୍ରତିଶତ ଅର୍ଥାତ ୫୮ ପ୍ରତିଶତ ବଜେଟକୁ ନେଇ ସନ୍ତୁଷ୍ଟ ନଥିବା କହିଛନ୍ତି । ୨୬ ପ୍ରତିଶତଙ୍କ ନଜରରେ ଏହା ଏକ ସାଧାରଣ ବଜେଟ୍ ହୋଇଥିବା ବେଳେ ୧୨ ପ୍ରତିଶତ ବଜେଟକୁ ନେଇ ସନ୍ତୁଷ୍ଟ ଥିବା କହିଛନ୍ତି । ୪ ପ୍ରତିଶତ କିଛି ମଧ୍ୟ କହିବାକୁ ମନା କରିଦେଇଥିଲେ ।
୪. ବଜେଟରେ କରୋନା ପିଡିତଙ୍କ ବାବଦରେ ଘୋଷଣାକୁ ନେଇ ଆପଣଙ୍କ ମତ କ’ଣ ?
ଏହାକୁ ନେଇ ୫୦ ପ୍ରତିଶତଙ୍କ ମତ ଥିଲା ଯେ, ସରକାର କରୋନା ପିଡିତଙ୍କ ବାବଦରେ ଘୋଷଣା କରିବାର ଥିଲା । ୩ ପ୍ରତିଶତ ଭାବୁଛନ୍ତି ଯେ, ବଜେଟକୁ ନେଇ କରୋନା ପିଡିତ ଖୁସି ହେବେ । କିନ୍ତୁ ୧୮ ପ୍ରତିଶତଙ୍କ କହିବା ହେଉଛି ଏହାଦ୍ୱାରା କିଛି ଫରକ ପଡିବାର ନାହିଁ । ୨୯ ପ୍ରତିଶତଙ୍କୁ ଲାଗୁଛି ଯେ, ବଜେଟକୁ ନେଇ ସରକାର ଠିକରେ କାମ କରିନାହାନ୍ତି ।
୫. ଏଥର ବଜେଟରେ କାହା ଉପରେ ଅଧିକ ଫୋକସ କରାଯାଇଛି ?
୬୩ ପ୍ରତିଶତ ଭାବନ୍ତି ଯେ, ସରକାର କେବଳ ଦେଖାଣିଆ ଭାବେ ଫୋକସ କରିଛନ୍ତି । ସରକାର ଲୋକଙ୍କ ସମସ୍ୟାକୁ ନେଇ ଅଧିକ ଚିନ୍ତା କରିନାହାନ୍ତି । ୮ ପ୍ରତିଶତଙ୍କ ମାନିବା ହେଉଛି ସରକାର ଜନକଲ୍ୟାଣକାରୀ ଯୋଜନା ଉପରେ ଅଧିକ ଫୋକସ କରିଛନ୍ତି । ଅନ୍ୟପକ୍ଷରେ ୪ ପ୍ରତିଶତଙ୍କ କହିବା ହେଉଛି ସବୁ କ୍ଷେତ୍ରକୁ ସମାନ ଗୁରୁତ୍ୱ ଦିଆଯାଇଛି ।
