ଶାହରୁଖଙ୍କ ପୁଅ ଡ୍ରଗ୍ସ ମାମଲାରେ ଛନ୍ଦି ହୋଇଛନ୍ତି । ପୁଅ ପାଇଁ ବେଲ ଯୋଗାଡରେ ବ୍ୟସ୍ତ ଅଛନ୍ତି କିଙ୍ଗ୍ ଖାନ୍ । ଏହାରି ଭିତରେ କିଙ୍ଗ୍ ଖାନ ଓ ତାଙ୍କ ପୁଅ ସମର୍ଥନରେ ଷ୍ଟାଣ୍ଡ୍ ୱିଥ୍ ଶାହରୁଖ ଟ୍ୱିଟରରେ ଟ୍ରେଣ୍ଡ୍ କରୁଛି । ଫ୍ୟାନଙ୍କଠାରୁ ବଲିଉଡର ଏ ଲିଷ୍ଟର ଶାହରୁଖଙ୍କ ପ୍ରତି ସମର୍ଥନ ବ୍ୟକ୍ତ କରୁଛନ୍ତି । କିଏ କ୍ୟାମେରା ଆଗରେ ଆର୍ୟନକୁ ସୁନା ପୁଅ କହୁଛି ତ’ କିଏ ସୋସିଆଲ ମିଡିଆରେ ଖୋଲା ଚିଠି ଲେଖୁଛି । ଏସବୁ ଭିତରେ କିନ୍ତୁ ଶାହରୁଖ ପ୍ୟାରେଣ୍ଟିଂ ବା ପିଲାଙ୍କ ଲାଳନ ପାଳନକୁ ନେଇ ମଧ୍ୟ କିଛି ପ୍ରଶ୍ନ ଉଠାଉଛନ୍ତି । ଖୋଦ ଆର୍ୟନ ଏନସିବିକୁ କହି ସାରିଛନ୍ତି ତାଙ୍କୁ ବାପାଙ୍କ ସହିତ କଥା ହେବା ପାଇଁ ଆପଏଣ୍ଟମେଣ୍ଟ୍ ନେବାକୁ ପଡୁଥିଲା । ଏମିତିରେ ପ୍ୟାରେଣ୍ଟିଂକୁ ନେଇ ପ୍ରଶ୍ନ ଉଠିବା ସ୍ୱଭାବିକ କଥା ।
ପ୍ୟାରେଣ୍ଟିଂ କଥା ଉଠାଇ କିଛି ବ୍ୟକ୍ତି ଶାହରୁଖ ଓ ଜ୍ୟାକି ଚେନଙ୍କ ମଧ୍ୟରେ ତୁଳନା କରୁଛନ୍ତି । କାରଣ ହେଉଛି କିଛି ବର୍ଷ ତଳେ ଜ୍ୟାକିଙ୍କ ପୁଅ ଡ୍ରଗ୍ସ ନେଇ ଧରା ପଡିଥିଲେ । ସେତେବେଳେ ଜ୍ୟାକି ସାମ୍ନାକୁ ଆସି କହିଥିଲେ ମୋ ଲାଳନ ପାଳନରେ ଭୁଲ ରହିଯାଇଛି । ତେଣୁ ମୁଁ କ୍ଷମା ମାଗୁଛି । ଜ୍ୟାକିଙ୍କ ଉଦାହରଣ ଦେଇ ଏବେ ଶାହରୁଖଙ୍କୁ ମଧ୍ୟ କ୍ଷମା ମାଗିବାକୁ ଦାବି କରାଯାଉଛି । ତେବେ ଆସନ୍ତୁ ଜାଣିବା କେମିତି ଜ୍ୟାକି ଚେନ୍ ନିଜ ପୁଅର ଭୁଲ ପାଇଁ କ୍ଷମା ମାଗିଥିଲେ ।
୨୦୧୪ ମସିହାରେ ଜ୍ୟାକି ଚ୍ୟାନଙ୍କ ପୁଅ Jaycee Chanଙ୍କୁ ଚୀନ ପୋଲିସ ଗିରଫ କରିଥିଲା । ପେଶାରେ ଅଭିନେତା ଏବଂ Musician Jaycee Chanଙ୍କ ଉପରେ ଡ୍ରଗ୍ସ ସେବନ କରୁଥିବା ଅଭିଯୋଗ ହୋଇଥିଲା । Jaycee Chanଙ୍କ ପାଖିପାଖି ୧୦୦ ଗ୍ରାମ ଗଞ୍ଜେଇ ଜବତ କରାଯାଇଥିଲା । ତାଙ୍କ ଡାକ୍ତରୀ ପରୀକ୍ଷାରେ ଏହା ମଧ୍ୟ ଜଣାପଡିଥିଲା ଯେ ସେ ନିଷିଦ୍ଧ ପଦାର୍ଥ ସେବନ କରିଛନ୍ତି । ସେହି ସମୟରେ, ଜେଏସୀ ଚ୍ୟାନଙ୍କ ସହ ୨୩ ବର୍ଷୀୟ ଜଣେ ତାଇୱାନ ଅଭିନେତା କାଇ କୋ ଏବଂ Mister Song ନାମକ ଜଣେ ବ୍ୟକ୍ତିଙ୍କୁ ଡ୍ରଗ୍ସ ଚୋରା ଚାଲାଣ ପାଇଁ ଗିରଫ କରାଯାଇଥିଲା ।
୨୦୧୫ରେ ବେଜିଂର Dongcheng District Courtରେ Jaycee Chan ମାନିଥିଲେ ଯେ ସେ ଅନ୍ୟଙ୍କୁ ନିଜ ପାଖରେ ଡ୍ରଗ୍ସ ସେବନ କରିବା ପାଇଁ ଆଶ୍ରୟ ଦେଉଥିଲେ । ଯାଞ୍ଚ ପରେ ଜଣାପଡ଼ିଥିଲା ଯେ, ଅନେକ ସେଲିବ୍ରିଟି Jaycee Chanଙ୍କ ଆପାର୍ଟମେଣ୍ଟକୁ ଡ୍ରଗ୍ସ ସେବନ କରିବା ପାଇଁ ଆସୁଥିଲେ । ଏହି ମାମଲାରେ Jaycee Chanଙ୍କୁ ୬ ମାସର ଜେଲ ଦଣ୍ଡ ସହ ୨୩ ହଜାର ୩୭୫ ଟଙ୍କାର ଜରିମାନା ଲଗାଯାଇଥିଲା । ତେବେ ଏହି ପୂରା ମାମଲାରେ ଅଭିନେତା ଜ୍ୟାକି ଚ୍ୟାନଙ୍କୁ ଲଜ୍ଜିତ ହେବାକୁ ପଡ଼ିଥିଲା । ସେ ଏକ ବୟାନ ଦେଇ କହିଥିଲେ ଯେ, ସେ ତାଙ୍କ ପୁଅର କାର୍ଯ୍ୟକଳାପରେ ଲଜ୍ଜିତ ଏବଂ ଦୁଃଖିତ ମଧ୍ୟ ।
୨୦୦୯ ମସିହାରେ ଚୀନ୍ ପୋଲିସ୍ ଦ୍ୱାରା ଜ୍ୟାକି ଚ୍ୟାନଙ୍କୁ Narcotics Control Ambassador ଭାବେ ଘୋଷଣା କରାଯାଇଥିଲା । ଚାଇନାରେ ଡ୍ରଗ୍ସ ବିରୋଧରେ ଚାଲିଥିବା ଆନ୍ଦୋଳନରେ ମଧ୍ୟ ସେ ଥିଲେ । ଏପରି ପରିସ୍ଥିତିରେ, ଯେତେବେଳେ ତାଙ୍କ ପୁଅର ଡ୍ରଗ୍ ମାମଲାରେ ସମ୍ପୃକ୍ତି ସାମ୍ନାକୁ ଆସିଲା, ସେତେବେଳେ ସେ ନିଶ୍ଚିତ ଭାବରେ ନିରାଶ ହୋଇଥିଲେ ।
ଏଥିପାଇଁ ଜ୍ୟାକି ଚ୍ୟାନ ସମଗ୍ର ବିଶ୍ୱକୁ କ୍ଷମା ମାଗିଥିଲେ । ସେ ସୋସିଆଲ ମିଡିଆରେ ଲେଖିଥିଲେ ଯେ, ‘ମୁଁ ବହୁତ ଲଜ୍ଜିତ ଅନୁଭବ କରୁଛି । ମୋ ପୁଅର କାର୍ଯ୍ୟକଳାପ ପାଇଁ ମୁଁ ଅତ୍ୟଧିକ କ୍ରୋଧିତ ଏବଂ ଲଜ୍ଜିତ । ମୁଁ ଆଶା କରୁଛି ଜୟସିଙ୍କ କାହାଣୀ ଯୁବକମାନଙ୍କ ପାଇଁ ଉପଯୋଗୀ ହେବ ଏବଂ ସେ ଡ୍ରଗ୍ସ ଠାରୁ ଦୂରରେ ରହିବେ । ମୁଁ ମୋ ପୁଅକୁ ଉପଯୁକ୍ତ ଲାଳନପାଳନ କରିବାରେ ବିଫଳ ହେଲି ଏବଂ ମୁଁ ଏଥିପାଇଁ ସମ୍ପୂର୍ଣ୍ଣ ଦାୟିତ୍ୱ ଗ୍ରହଣ କରେ । ଜୟସି ଏବଂ ମୁଁ ସମାଜ ଆଗରେ ମୁଣ୍ଡ ନୁଆଁଇ କ୍ଷମା ପ୍ରାର୍ଥନା କରୁଛୁ ।’
ଜ୍ୟାକି ଯେମିତି ନିଜ ପୁଅର ଭୂଲ ପାଇଁ କ୍ଷମା ମାଗିଥିଲ । ପୁଅକୁ ପାଳିବାରେ ତାଙ୍କର ଭୂଲ ଭଟକା ରହିଛି ବୋଲି ମାନିଥିଲେ ସେହିଭଳି ଶାହାରୁଖ ମଧ୍ୟ ଭୁଲ ମାଗନ୍ତୁ ବୋଲି ଲୋକ କହୁଛନ୍ତି । ଦେଖିବାକୁ ଗଲେ ଏଥିରେ କିଛି ଯୁକ୍ତି ରହିଛି । କାରଣ ଶାହରୁଖଙ୍କୁ ଅନେକ ନିଜ ରୋଲ୍ ମଡେଲ ଭାବେ ନେଇଥାନ୍ତି । କେବଳ ଶାହରୁଖ ନୁହନ୍ତି । ଏବେ ଏହି ମାମଲାରେ ଆର୍ୟନଙ୍କୁ ସମର୍ଥନ କରିବା ନାଁରେ ଯେଉଁ ଯେଉଁ ବଲିଉଡ୍ ଷ୍ଟାର ଷ୍ଟାଣ୍ଡ୍ ୱିଥ୍ ଶାହରୁଖ ଡବାକୁ ଡେଉଁଛନ୍ତି ସେମାନେ ମଧ୍ୟ ଭାବିବାର ସମୟ ଆସିଛି । ନିଶା ବିରୋଧରେ କ୍ୟାମେରା ସାମ୍ନାର ବଡ଼ ବଡ଼ କଥା କହୁଥିବା ଷ୍ଟାର ଏବେ କେମିତି ଏହି ମାମଲାରେ ଆର୍ୟନଙ୍କୁ ସମର୍ଥନରେ ଛିଡା ହୋଇ ପାରିବେ ? ଆର୍ଯନଙ୍କୁ ସପୋର୍ଟର ଆବଶ୍ୟକତା ଅଛି ସତ କିନ୍ତୁ ଏହାର ଅର୍ଥ ନୁହେଁ ଯେ, ତାଙ୍କ ଭୁଲକୁ ‘ଛୋଟିଆ ଭୁଲ’ ଭାବେ ନେବା । ଅବଶ୍ୟ ଶାହରୁଖଙ୍କ ବ୍ରାଣ୍ଡ୍ ଭ୍ୟାଲୁ ଓ ୫ ହଜାର କୋଟିରୁ ଅଧିକ ନେଟ୍ ୱର୍ଥ ବଲିଉଡର ବାକି ତାରକାଙ୍କୁ ତାଙ୍କ ପଛରେ ଛିଡା ହେବାକୁ ବାଧ୍ୟ କରୁଥାଇ ପାରେ । ଆଉ ଯଦି ଏହ ସତ ତେବେ, ଆମ ଷ୍ଟାର ମାନଙ୍କର ଜ୍ୟାକିଙ୍କଠାରୁ ବହୁତ କିଛି ଶିଖିବାର ଅଛି ।
