ମହାରାଷ୍ଟ୍ର ରାଜନୀତିରେ ଗେମ ଚେଂଜର ହୋଇ ସାରିଥିବା ଏକନାଥ ସିନ୍ଦେଙ୍କ ବିଦ୍ରୋହ ମହାରାଷ୍ଟ୍ର ତଥା ଶିବସେନା ଇତିହାସର ସବୁଠାରୁ ବଡ଼ ରାଜନୈତିକ ବିଦ୍ରୋହରେ ପରିଣତ ହୋଇ ସାରିଛି । ଏବେ କୁହା ଯାଉଛି ଯେ, ଏକନାଥ ସିନ୍ଦେଙ୍କ ବିଦ୍ରୋହ ପଛରେ ଅନେକ କାରଣ ଥିବା ବେଳେ ଗୋଟିଏ କାରଣ ହେଉଛି ମରାଠି ଫିଲ୍ମ ଧର୍ମବୀର । ଧର୍ମବୀର ଫିଲ୍ମର ସ୍କ୍ରିନିଂ କାଳରେ ହିଁ ବିଦ୍ରୋହର ସ୍କ୍ରିପ୍ଟ ଲେଖା ଯାଇଥିବା ବୋଲି କୁହାଯାଉଛି ।
ଫିଲ୍ମ ଅଧାରୁ ଚାଲି ଯାଇଥିଲେ ଉଦ୍ଧବ
ଫିଲ୍ମ ସ୍କ୍ରିନିଂକୁ ଉଦ୍ଧବ ଠାକରେ ଯାଇଥିଲେ । ତାଙ୍କ ସହିତ ଏକନାଥ ମଧ୍ୟ ଯାଇଥିଲେ । ତେବେ ଫିଲ୍ମ କ୍ଲାଇମାକ୍ସ ପୂର୍ବରୁ ଉଦ୍ଧବ ବାହାରି ଯାଇଇଥଲେ । ପୁରା ଫିଲ୍ମ ନଦେଖିବାର କାରଣ ଦର୍ଶାଇବାକୁ ଯାଇ ସେତେବେଳେ ଉଦ୍ଧବ କହିଥିଲେ ଯେ, ମୁଁ ଧର୍ମବୀର ଆନନ୍ଦ ଦିଘେଙ୍କ ମୃତ୍ୟୁ ଦୃଷ୍ୟ ଦେଖି ପାରିନଥାନ୍ତି ।
ଏହି ଫିଲ୍ମକୁ ଏକନାଥ ସିନ୍ଦେ ଲଂଚ୍ କରିଥିଲେ । ସେ ଫିଲ୍ମର ଟିକେଟ୍ କିଣି ନିଜ ସମର୍ଥକଙ୍କ ମଧ୍ୟରେ ବାଣ୍ଟିଥିଲେ । ଏହି ଫିଲ୍ମରେ ତାଙ୍କୁ ଆନନ୍ଦ ଦିଘେଙ୍କ ଉତ୍ତରାଧିକାରୀ ଭାବେ ଦେଖାଯାଇଛି । ସିନ୍ଦେ ଚାହୁଁଥିଲେ ଯେ, ତାଙ୍କ ସମର୍ଥକ ଜାଣନ୍ତୁ ଯେ, ଦିଘେ ତାଙ୍କୁ ନିଜ ଉତ୍ତରାଧିକାରୀ ଭାବେ ଭାବୁଥିଲେ ।
ଗୁରୁଙ୍କ ରାସ୍ତାରେ ସିନ୍ଦେ
ଆଜି ଏକନାଥ ଶିବସେନା ସୁପ୍ରିମୋଙ୍କ ବିରୋଧରେ ବିଦ୍ରୋହର ବିଗୁଲ ଫୁଙ୍କିଛନ୍ତି । ଦିନେ ତାଙ୍କ ଗୁରୁ ବାଲା ସାହାବଙ୍କ ବିରୋଧରେ ବିଦ୍ରୋହ କରିଥିଲେ । ଥାନେରେ ଥିଲା ଆନନ୍ଦ ଦିଘେଙ୍କ ଏକାଧିପତ୍ୟ । ସେ ବାଲା ସାହାବଙ୍କ ଆଦେଶକୁ ମଧ୍ୟ ବେଳେବେଳେ ମାନୁନଥିଲେ । ଥାନେର ସେ ନିଜ ମର୍ଜିରେ ଶିବସେନାକୁ ଚଳାଉଥିଲେ । ସେତେବେଳେ ଶିବସେନାରେ ଥାକ୍ରେଙ୍କ ପରେ ସେ ଥିଲେ ଦ୍ୱିତୀୟ କ୍ଷମତା କେନ୍ଦ୍ର । ଏବେ ମହାରାଷ୍ଟ୍ର ରାଜନୀତିରେ ଚର୍ଚ୍ଚା ଯେ, ସିନ୍ଦେ ନିଜ ଗୁରୁଙ୍କ ପଥର ପଥିକ ।
କେବେ ଉଦ୍ଧବଙ୍କ ନାକ କାନ ଥିଲା ସିନ୍ଦେ
ଏମିତି ନୁହେଁ ଯେ, ଉଦ୍ଧବ ଓ ସିନ୍ଦେଙ୍କ ମଧ୍ୟରେ ଅଚାନକ ଶତ୍ରୁତା ଆରମ୍ଭ ହୋଇଛି । ଗୋଟିଏ ସମୟରେ ସିନ୍ଦେ ଥିଲେ ଉଦ୍ଧବଙ୍କ ବିଶ୍ୱସ୍ତ । କିନ୍ତୁ କଂଗ୍ରେସ ଓ ଏନସିପି ସହିତ ମେଣ୍ଟ ସରକାର ପରେ ବିଜେପି ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବୀସଙ୍କ ସହିତ ତାଙ୍କ ସମ୍ପର୍କ କାରଣରୁ ତାଙ୍କୁ ଉଦ୍ଧବଙ୍କ ଚକ୍ଷୁଶୂଳ ହେବାକୁ ପଡିଥିଲା ।
ରାତି ଅଧରେ ବିଧାୟକଙ୍କ ଫୋନ୍ ଉଠାନ୍ତି ସିନ୍ଦେ
ଶିବସେନା ବିଦ୍ରୋହୀ ବିଧାୟକଙ୍କ ବଡ଼ ଅଭିଯୋଗ ହେଉଛି ମାତୋଶ୍ରୀ ଓ ମୁଖ୍ୟମନ୍ତ୍ରୀଙ୍କ ଅଫିସ ସେମାନଙ୍କୁ ନଜର ଅନ୍ଦାଜ କରୁଥିଲା । କିନ୍ତୁ ସିନ୍ଦେ ନିଜ ଦଳର ବିଧାୟକଙ୍କ ପାଇଁ ସବୁବେଳେ ଉପଲବ୍ଧ ଥିଲେ । କୁହାଯାଏ ଯେ, ସେ ରାତି ଅଧରେ ମଧ୍ୟ ଫୋନ୍ ରିସିଭ କରି ବିଧାୟକଙ୍କୁ ସାହାଯ୍ୟ କରୁଥିଲେ । ଯେଉଁଥିପାଇ ଏବେ ବିଦ୍ରୋହୀ ତାଙ୍କ ଚାରିପଟେ ମେଳି ବାନ୍ଧିଛନ୍ତି ।
