ଆବର୍ଜନାରୁ ଆକର୍ଷଣ
ଯାହାକୁ ଆମେ ଅଦରକାରୀ ଜିନିଷ ବୋଲି ଭାବି ବାହାରେ ଫିଙ୍ଗି ଦେଇଥାଉ ସେଥିରୁ ତିଆରି ହୋଇଛି ବ୍ୟବହାର୍ଯ୍ୟ ସାମଗ୍ରୀ । ପରିବେଶକୁ ନଷ୍ଟ କରୁଥିବା ଟାୟାରରୁ ପ୍ରସ୍ତୁତ ହୋଇଛି ଟିଂପଏ ସେଟ୍ । ଗ୍ୟାରେଜ୍ ହେଉ ଅବା ଅଳିଆଗଦାରେ ପଡ଼ି ରହିଥିବା ଟାୟାର ଟ୍ୟୁବ୍ ସବୁକୁ ନେଇ ଅଭିନବ ଉପାୟରେ ଅତି ଆକର୍ଷଣୀୟ ସାମଗ୍ରୀ ତିଆରି ହୋଇପାରୁଛି । ପୂର୍ବରୁ ବର୍ଜ୍ୟବସ୍ତୁରେ ବିଭିନ୍ନ ଉପାଦେୟ ସାମଗ୍ରୀ ତିଆରି କରିଥିବା ଏହି ଶିଳ୍ପୀ ଜଣକ ହେଲେ ପ୍ରିୟରଞ୍ଜନ ବରାଳ । ଭଙ୍ଗା କି’ ବୋର୍ଡ, ପ୍ଲାଷ୍ଟିକ୍ ବୋତଲ ଆଦି ବର୍ଜ୍ୟବସ୍ତୁରୁ ବିଭିନ୍ନ ସମୟରେ ଅନେକ ଉପାଦେୟ ସାମଗ୍ରୀ ପ୍ରସ୍ତୁତ କରି ରଖିଛନ୍ତି । ଟାୟାରକୁ ନେଇ ଏକ ନିଆରା ଢ଼ଙ୍ଗରେ ପ୍ରସ୍ତୁତ କରିଛନ୍ତି ଟିପଏ ସେଟ୍ । ଯାହା କି ଶୁଣିବାକୁ ଯେପରି ଭିନ୍ନ ଦେଖିବାକୁ ମଧ୍ୟ ଭିନ୍ନ । ୨୩ଟି ଟାୟାରକୁ ନେଇ ହୋଇଛି ଏହି ଚେୟାର ଟେବୁଲ ସେଟ୍ । ୪ଟା ଚେୟାର ସଙ୍ଗକୁ ଗୋଟିଏ ଟିପଏ ପ୍ରସ୍ତୁତିରେ ଲାଗିପଡ଼ିଛନ୍ତି ପ୍ରିୟରଞ୍ଜନ । ପ୍ରତିଟି ଚେୟାର ସେ ୫ଟି ଟାୟାରରେ ତିଆରି କରୁଛନ୍ତି । ସେହିପରି ଟିପଏ ଟେବୁଲକୁ ସେ ୩ଟି ଟାୟାର ବ୍ୟବହାର କରିଛନ୍ତି । ପ୍ରତିଦିନ ଗୋଟିଏ ଲେଖାଏଁ ଟାୟାର ଚେୟାର ତିଆରି କରୁଛନ୍ତି ସେ ।
କରୋନା ମହାମାରୀ ସମୟରେ ଶିଳ୍ପୀ ପ୍ରିୟରଞ୍ଜନ ବର୍ଜ୍ୟବସ୍ତୁରୁ କରି ଚାଲିଛନ୍ତି ଅନେକ ଅନେକ ସର୍ଜନା । ପ୍ଲାଷ୍ଟିକ୍ ହେଉ ଅବା ରବର୍ ସାମଗ୍ରୀ ହୋଇଥିବାରୁ ଏଣେତେଣେ ଫିଙ୍ଗିବା ଦ୍ୱାରା ପରିବେଶ ଦୂଷିତ ହେବା ସହ ମାଟିରେ ମିଶେ ନାହିଁ । ଏଥିପାଇଁ ଅଦରକାରୀକୁ ବ୍ୟବହାର କରି ସେ ସୁନ୍ଦର ବ୍ୟବହାରିକ ସାମଗ୍ରୀ ବା ଘରସଜ୍ଜା ସାମଗ୍ରୀ ପ୍ରସ୍ତୁତ କରିବାର ପ୍ରୟାସ ଆରମ୍ଭ କରିଛନ୍ତି । ଏହି ଅଦରକାରୀ ଟାୟାର ସବୁକୁ ଗ୍ୟାରେଜ୍ରୁ ସଂଗ୍ରହ କରି ସେସବୁକୁ କାଟି ପ୍ଲାଷ୍ଟିକ୍ ଦଉଡ଼ିରେ ବାନ୍ଧି ସୁନ୍ଦର ଆରାମ ଚୌକି ସେଟ୍ ପ୍ରସ୍ତୁତ କରିଛନ୍ତି । ଏହି ଚୌକି ସବୁକୁ ନେଇ ସୁସଜ୍ଜିତ ଭାବେ ସଜାଇବା ପାଇଁ ଜଣେ ଗାର୍ଡେନର ତାଙ୍କୁ ଅର୍ଡର କରିଛନ୍ତି । ଏ ସମ୍ପର୍କରେ ପ୍ରିୟରଞ୍ଜନ କହନ୍ତି ଅଦରକାରୀ ବି ଦରକାରୀ ହୋଇପାରେ । ପରିବେଶ ଓ ସୌନ୍ଦର୍ଯ୍ୟ ନଷ୍ଟ କରୁଥିବା ସାମଗ୍ରୀରୁ ଟାୟାର ଚେୟାର ସେଟ୍ ପ୍ରସ୍ତୁତ କରୁଛି । ଆଗକୁ ଅନ୍ୟାନ୍ୟ ଘରସଜ୍ଜା ସାମଗ୍ରୀ ତିଆରି ପାଇଁ ଯୋଜନା ରହିଛି । ପ୍ରିୟରଞ୍ଜନଙ୍କ ଏହି ନିଆରା କାରୁକାର୍ଯ୍ୟକୁ ଦେଖିବାକୁ ଲୋକଙ୍କ ଭିତରେ ଉତ୍କଣ୍ଠା ବଢ଼ୁଥିବାବେଳେ ଅନେକ ଏହାକୁ ପ୍ରଶଂସା ମଧ୍ୟ କରିଛନ୍ତି ।
